James 1

1Wasika ye gmi n Yakubu akun nu, Shekwoyi bara n Dagayi Yesu Kristi nya yi. Kwoi lo a Yahudiyi a Yesu-viyi aba, n ɓa busi yafi laɓa nyi, mi tnu fye lo n gnaɓiyi.

Azhingye Mi Alu

2Omi azaje ye-yeyi, fye sin wahala lo, fyei gye azhin? Fye dagma. 3Ntu ge esa wahala nyi, efye bugba-bwa zhin kwa mwa. 4Fa efye bugba bwa kwa mwa har fya ze aza hin-hin, nfye ta gyi nyaho san. 5Nfye n cei pma fya kpe enya n Shekwoyi ye fya zhin, fye nya wo, wo ɓa wu fye n ɓugbai gmanyi, gama wo n shiri yi zhin lo wa ga oza ɓeyekpe n bugbai gmanyi, oza nwa nya wo, wo ta na ɓon.

6Ama n ha nya wo, la awyetu n ge woɓa gaho, gama bugba shaka zhinyi wu ngye anuwan dokwo nu n ese zhin kwa cekwo abwaya nyi. 7– 8Shaula doho-dohoi nha zhin, hoi to n bugbai shi lo pin, shi ho pmi lo bwaye ha pmilo bwaye. Nhoto nya n gaiciya gayin, to gye ge Dagayi ɓaga ho amsan. 9Yesu-viyi nwo to zhin nyaho nu dna n na nyin, a dawo, gama wo zhin nyaho nu n Dagayi abye.

10– 11Ama nyabwayi dagma n tuge owo nyabwa to zhin nyaho nu n Dagayi aban, gama esa fyewyi wo ɓa duya ngye mamawyi n kwo bmiya-bmiya la duya kwoi la bwa, kwo la fi ntu n nyipyei wo-wo ɓo. Anyabwai wulo, nu Safyewyi ɓa ɓa fi ɓa fa ɓa nyabwa n ɓa avun.

12Bugba bui-da nu oza n wo wan wohin shi, to wa kaya dna n jaraban, gama n na avun wo ɓa bwa rawani wye-wyeyi nyalo-nyalo nya, n Dagayi a zhin aza alkawali nɓa ye wo nyi. 13Pa esa n oza ye wa zhin ɓenukwoyi, Shekwoyi nu ta zhin wo jaraban, gama Shekwoyi ta zhin ɓenukwoyin, woi ta zhin aza jaraba n ɓenukwoyin.

14Jaraba kun n oza bugba nu, oza n wo n shakpei fi n wo mi. 15Aɓonubo-zhin nukwoyi ye zhin oza wa zhin aɓo nukwoyi, n na avun kwa zhin oza wa gwo tata efi nya n Shekwoyi aba. 16Ntucenu fye to bwi zokwon, emi azaje.

Bemana Gmi N Shekwoyi A ba Nu

17Ama enya manayi doho-dohoyi nkwo bmiya kwo gmi n Shekwoyi aba nu, Owo na zhin buzangna, woi bmiyana nyalo-nyalo, n tna jejelu kwo kuwa wyegma. 18Njesun nyipyei a gmadanya nu n wo aba ewyi n wo ɓei gayi awye-wyeyi woi-woi n cei nyi, ntu gaiciya owo ɓeda nya ɓo, ya ku ze, aɓo kmisunyi, Owo puwa woi-woi nya.

19Omi azaje ye-yeyi fye to ze amwi ge, kwo gna bmiya oza kna ɓeda tnubuan n mwa, ama oza daɓo cewyi, to oza gyi minagyin. 20Gama minagyi ta zhin yi ya ze aza manayin, shi Shekwoyi ye ya zen.

21Ntu cenu fye la anya nukwoyi kunya nfye awye-wyeyi nɓa to bmiyan, n na ɓo yi n ɓa she fye kna, fya gba fyehin tukwo fya dagma shi fye la nabari manayi woi-woi gwo, gama kwo ɓami kwa gni yi awyewyeyi, ngye shi kwo shi yi abugba bwa nyi. 22Fye pa ge ɓeda nu n oza ɓa zhinkwo, to ge oza knatun-bua kawai n, Ntu cenu fye to dna fyehin kwocen.

23Gama n oza wo, to wa zhin, wo wu ngye ozanu n wo shi wohin awye n maganyi. 24Shi wo la kala wo ta shan wohin awyeshi wa shan pa ngye shi wo wun. 25Ama n oza shi wohin awye biwu n Shekwoyi owa, nkwo zai lo-lo yi ya nyi, wo ta pa kwo ɓonu gmanyin, ama wo ɓa zhin oɓo n kwa da. Shekwoyi ɓa tu wo anabarka dna n ɓeho-ɓehoyi n wo ɓa zhin.

26Oza nwa ci ge wo zhin Yesu-viyi nu, to wa wan wo nyitala shi nkwo gyi-gyi-yi ngye ebe nyin, wo dna wohin kwoce nu, owo knunnu zhin gbeloyi nu.

27Yesu-viyi nwo gyi-gyi-yi ntna aɓe nya n Shekwoyi Dada awyeba, ozanu n wo shi a kuwyi bwa, n na anyigbayi, n zayi n wo kpema Dagayi n gaiciya yi, to wun-wun yi ya, kwo n tucegye n na anyi nya yin.